Bugun Axborot va ommaviy kommunikatsiyalar agentligida Maktabgacha va maktab taʼlimi vazirligi hamda vazirlik huzuridagi A.Avloniy nomidagi pedagogik mahorat milliy instituti masʼullari ishtirokida matbuot anjumani o‘tkazildi. 

Anjumanda 2024-2025-o‘quv yilidan boshlab umumiy o‘rta taʼlim muassasalari o‘qituvchilari uchun fanlar kesimida bosqichma-bosqich joriy etilishi belgilangan "Kasbiy rivojlanish kuni" va "Kasbiy rivojlantirish soati" tadbirlari to‘g‘risida axborot berildi.

Mazkur tartibga binoan:

• Fanlar kesimida o‘qituvchilarni kasbiy rivojlanish va o‘zi ustida ishlashlari uchun haftaning alohida  kunlari belgilanishi;
• “Kasbiy rivojlanish kun”larida tegishli fan o‘qituvchilari uchun tayanch maktablarida o‘quv mashg‘ulotlari tashkil qilinishi va ularda olingan bilimlarni pedagogik amaliyotda qo‘llashlari uchun metodik yordam ko‘rsatilishi;
• “Kasbiy rivojlanish kuni” tadbirlarini tashkil etish uchun har bir tuman (shahar)da yuqori malakali mentor-o‘qituvchilar tanlab olinishi;
• A.Avloniy nomidagi pedagogik mahorat milliy instituti va hududiy markazlarda mentor-o‘qituvchilar uchun alohida tayyorlov kurslari tashkil etilishi;
• Mentor-o‘qituvchi sifatida faoliyat yuritayotgan fan o‘qituvchilariga asosiy ish joyi bo‘lgan umumiy o‘rta taʼlim muassasasi direktor jamg‘armasi hisobidan lavozim maoshining 20 foizi miqdorida qo‘shimcha har oylik ustama haq to‘lanishi taʼkidlandi.